Rev 12 | BEF | STEP | Ya hulago kokulumagu li nupa sipi mone ma huto huto hu'ehina. A'i mone mino'ehina ai yege silifi'amofihi kata lolo higo mino'ehina. Gigusa komopa'aluga ya'ma ikahi mele ete'ahana. To lataha'alo ya'ma sonofi'i 12 yanatu kakili'a lolo hi ete'ahana.

Revelation of John 12

A'i mone hiti hagulu osifa'i etalika'atiti

1 Ya hulago kokulumagu li nupa sipi mone ma huto huto hu'ehina. A'i mone mino'ehina ai yege silifi'amofihi kata lolo higo mino'ehina. Gigusa komopa'aluga ya'ma ikahi mele ete'ahana. To lataha'alo ya'ma sonofi'i 12 yanatu kakili'a lolo hi ete'ahana. 2 To ai yagapana'a hiti ketalina'mu yabe. Pana'i ketalube'mu nohuto gabu gigo usege'i asege'i huto sipi nogo'a luto mino'ehina.

3 To ya huto nohigo kokulumaguti li nupa mone ma huto huto hu'ehina. Hagulu osifa'i sipi mone mino'ehina. Keleha'a safa kini kini luto mino'ehina. Lataha'a ya'ma 7 to komu'a 10 mino'ehina. To lataha'alo kakili 7 bu'ehinalo ya'ma enigihiti bomagihi kakili mone bi etelago mino'ehina. 4 Ya nohigo ya nasanauba kokulumatoga tito nohuto kasa'atu sonofi'i ya'ma fi loko huto loebe monebe huto li tifi he'mi he'mi higo li gehesa mone ya'ma metoga limi'ehina. To hagulu osifa'i ai ya huloto a'uba pana'i neketenogo hoto nalube luto buto maha'aga ho tito mino'ehina. 5 To pana'i ya'ma ketago yamofihi noto noto bona'i aeoni fatusatu kaba hu epalalibe luto lu eto'ehina. To pana'i ya'ma huto hulago li fenene hite Hu'mamofitoga nu kite hololu lite lelite tite sekele mamu'a hiti kefa hisamofihi maha'aluga he'mi ete'ahana. 6 To a'i ai ya'ma koli huto buto ka metoga ikahi 42 li he'mito he'malabe luto Hu'mau le'mo bati hu'ehina hepato buto minago kaba hi etalune'mu habe.

7 Ya hulago kokulumaga luba sipi huto hu'ehina. Agelomagihi kaba bo'ani Mikaeli to yagapana'a hiti gonamu tamu'a hiti enali hagulu osifa'i hoto li he'milune lilete ete li nupa hi'ahana. To mone kegi'a ya'ma hagulu osifa'mofihi yagapana'a gonamu tamu'a ana hite ete luba hite melete mine'ahana. 8 To ya suhi hi'ahanaya Mikaeli to yagapana'a enali amuya melete luba hilana'a nehago hagulu osifa'i ai'a hiti to agelo'amagi hiti enali'i enebe ligi'ahana. Mikaeliu enali'i kokulumaguti he'mi epololoto kafe gi epolo'ehina. 9 To hagulu osifa'i napa'auba ai koyapa'i ema afeha'aga mino'ehina bo mone gi'amofihi Sata to fato gi'a enifisa ito noto noto bona'i enimi'i moloto enogolaga bilata bo le'mo fitu fe he'migo melugu limi'ehina. Ai'a hiti to yagapana'a hiti kokulumaguti fitu fo he'milago limite melugu mine'ahana.

10 Ya nehago kokulumaga ka sipi ma luto huto higo keheli'ohuna: Hu'mau lubuto bilata nohina to ai amuya bo to gulu ho letalibe luto lu leto'ehina bomofihi kaba hulata amuya'a ya'ma ahuto hu su habe. Le'mo ho ti'ehina bo, Mesia ai amuya'a huto huto nohinagihe. Ligibo lalalutigihi enali kalana'i molo epolo'ehina'mu Hu'mamofihi gobisalo ho tito kana'amu kana'amu utehi etehi ka foya li epoloba li epoloba hu'ehina bo ai ya'ma kokulumatogati fitu fo he'migo limi'ehibe. 11 Ligibo lalalutigihi sipisipi nala'amofihi golaha'amu keheli amuya mele'ahana'amagi ka lamana'a lu yege he'ahana'amu enali Satahi be ligi'ahana. Ya hite, filise'na'animu mekehelise to mino bati hise'na'animu mekeheli'ahanamo ni'ibe. 12 Ya hu'ehina'mu kokuluma komopa'agu komopa'agu to anagu minete bite ete hi'ahana'a lenali lenegelo bilo. To metoga to hege nagamilugu nehana'a akae lenalitiniba hena hena hilana ni'ibe? Ya'ma Satau ai lenalitoga foipa foya nolimibe. To kana'a alo'i ya'ma asu halube'mu hibe. Yamofihi keheli'ohuto'a kipakafa sipi higo ya'ma humofa'na nohibe.

13 Ya hulago enali hagulu osifa'i ai kokulumaguti he'mi etelago melugu limito mino'ehina'mu keheliloto pana'i keto'ehina a'i aitoga luba hilube luto buba buba nohibe. 14 To a'uba ai nama lupahi sipimofihi koke'na'a loemo li molo ete'ahago foto'i heloto buto kame meto minoto lito hu'ehinaga hagulu osifa'i melilibe luto fala ki'ehina. Ana kegi'a he'mete nehinogo kufu loebe monebe to mone nekisa'a kana su halina'mu mino'ehina yabe. 15 Ya nehinogo hagulu osifa'uba megesaga bagaguti sipi nagami'i bili he'migo bili limito hoto mino'ehina. 16 Ya hu'ehina ana a'mo nagamilugu holoto mobilibe luto ya hu'ehina. Ya hilube'mu nohigo me'uba ana a'i he'malube luto keko'i loko higo ana baga aka hoto suhi huto hagulu osifa'uba bili'ehina nagami'i ana kapogu limi su ho'ehina. 17 Limi su nohago hagulu osifa'i ai ya'ma ana a'mofi kumu ya'ma ita bigo yagapana'i gonamu tamu'amagihi Hu'ma lu laga hu'ehina kaga'a kehelilete Yesuhi ka lamana'a ya'ma li pili kete kosele'i meenahago lu huto hite lilata nehana bonatoga luba li epilube luto bu'ehina. 18 Ai nobuto hege nagami'mofihi kehetoga limito mino'ehina.